काठमाडौँ । काठमाडौँ महानगरपालिकाले आजदेखि ७० वर्षमाथिका जेष्ठ नागरिकहरूको घरमै पुगेर आधारभूत स्वास्थ्य सेवा तथा परीक्षण शुरु गरेको छ ।

कार्यवाहक मेयर सुनिता डंगोलका अनुसार आजबाट जटिल बिरामीलाई अस्पतालसम्म लैजाने काममा समेत महानगरले सहजीकरण गर्नेछ ।

डंगोलले वक्तव्य जारी गर्दै भनेकी छन्, ‘अब स्वास्थ्य सेवा अस्पतालमै सीमित रहने छैन । ७० वर्षभन्दा माथिका अभिभावकहरूका लागि घरमै आधारभूत स्वास्थ्य सेवा काठमाडौं महानगरपालिकाले आजबाट शुरु गर्दै छ । स्वास्थ्य सर्वेक्षणदेखि स्वास्थ्य प्रवर्द्धनसम्मको सहजीकरण, नियमित परीक्षण, आवश्यक औषधि, परामर्शदेखि जटिल अवस्थामा अस्पतालसम्मको सहजीकरण—सबै सेवा घरदैलोमै ।’